దొంగ కో లేఖ

ఒరేయ్ దొంగా
కాదులే
ఒరే మనిషీ
నా కష్టాలు తెలియవు నీకు
నా రెక్కల కష్టం గుర్తెరగువు నీవు
నా వాళ్ళనీ ఎరగవు నీవు
ఎక్కడో నిల్చున్న నన్ను
            కూర్చున్న నన్ను
            ప్రయాణిస్తున్న నన్ను
ఎలా ఎంచుకున్నావొ మరి నన్ను
అడిగితే ఇచ్చేవాడ్నెమో కదా కొంచెం
దొచేసావ్ పిల్లల చదువుల్ని
               ఒక కూతురి పెళ్లిని
               తాతయ్య ఆపరేషన్ని
               ఇంటి కనీస అవసరాల్ని
ఇప్పుడు ఏం చేయాలో అర్ధం కావడం లేదు
ఏదో ఒకటి చేస్తాలే
ఎందుకంటే కష్టానికి కష్టాలకి అలవాటు పడిపోయాను మరి
తీసుకేళ్తే తీసుకెళ్ళావ్
నా చెమట వాసనతో సారాయో బ్రాందీ యో విస్కీ యో తాగొద్దు మరి
నా రెక్కల కష్టం తో పేకాట గట్రా అడోద్దు మరి
ఒళ్ళు హూనం చేసి సంపాదించిన పైసలతొ ఏ సాని కొంపలోకో వెళ్ళొద్దు మరి
ఈ పాటికే అవి నీ మంచి అవసరానికి చేరాయని ఆశిస్తున్నాను
ఒ నలుగురు ఆకలి తీర్చిందని సంబరపడుతున్నాను
నీకు కడుపు నిండిందని ఆనందంతో
ఈ రోజు సంతోషంగా పడుకుంటున్నా పస్తుతో